Wednesday, December 25, 2019

नवीन वर्ष आणि व्यायामाचा संकल्प

लवकरच २०१९ संपून २०२० हे नवीन वर्ष सुरु होणार आहे.  प्रत्येक वर्षाच्या सुरवातीला अनेक संकल्प केले जातात. तया मधला सर्वात आवडीचा आणि दरवर्षी केला जाणारा संकल्प म्हणजे ' १ जानेवारीपासून व्यायाम... !' साधारणपणे हा संकल्प एक आठवडा, दोन आठवडे किंवा जास्तीत जास्त १ महिन्यापर्यंत चालतो.
मग हळू हळू आज नको उद्या, उद्या नको सोमवारी, सोमवारी नको, पुढच्या महिन्यात, असे करत व्यायामाचा संकल्प कधी हरवून जातो आणि वर्ष देखील संपून जाते हे  कळत पण नाही.

हा अनुभव सरासरी सगळ्यांचाच असेल. बरेच जण तर जिम ची महागडी फी पण भरतात. ती पण एकदम वर्षभराची. काही जण नवीन सायकल घेतात. सायकली बरोबर हेल्मेट, ग्लोज आणि इतरही बराच खर्च करतात. पण शेवटी काय होते.? एक दोन महिने गेल्यावर जिम ची फी देखील वाया जाते आणि घरातल्या अडगळीत सायकलची अजून एक भर पडते.

मित्रांनो,  आजकालच्या सुपरफास्ट जीवन शैलीमध्ये अन्न, पाणी, हवेइतकीच आपल्याला व्यायामाची गरज आहे. जसे या गोष्टी रोज आपल्या शरीराला आवश्यक आहेत, असाच व्यायाम देखील गरजेचा आहे. तोही रोजच्या रोज. प्रत्येकाच्या वयोमानानुसार, शरीरानुसार कोणताही असो, चालणे, धावणे, जिम अथवा सायकलिंग. कोणताही व्यायाम ना चुकता रोज करणे तितकेच गरजेचे आहे. त्यासाठी कोणत्याही १ जानेवारीच्या किंवा सोमवारच्या मुहूर्ताची गरज नाही. व्यायामाचा मुहूर्त हा आजच असतो आणि रोज असतो.

चला तर मग, आजच व्यायामाला सुरुवात करूयात! आणि येणाऱ्या नवीन वर्षात आपले शरीर अधिक आरोग्यदायी आणि अधिक बळकट  बनवूयात......!

नववर्षाभिनंदन!

Wednesday, April 25, 2018

तुझा सहवास

माझ्या अवतीभवती रोज खूप काही घडत असतं,
तुझा सहवास मात्र मनात घर करून रहातो...

तुझ्याशी जेंव्हा मी बोलतो, तेंव्हा मला बोलल्यासारखं वाटतं...
तुझा नाजूक आवाज ऐकून, अंग शहारल्या सारखं होतं...
एरवी माझं आयुष्य जणू, शांत आणि बंदिस्त असतं...

माझी नजर जेंव्हा तुझ्या नजरेशी भिडते,
हृदयाची धडधड, अचानकच वाढते,
तू जवळ नसलीस की तुला भेटावसं वाटतं...
तू जवळ आलीस की उगीचच उठून जावसं वाटतं...

तुझं बोलणं, तुझं वागणं, मला विचार करायला लावतं,
तुझ्या डोळ्यात माझं अस्तित्व, नेहमीच मला दिसतं,
रोज ठरवतो की आता, इथून दूर निघून जावं,
कितीही ठरवलं तरी मन, तुझ्या जवळच येऊन थांबतं...

कधी कधी मला वाटतं, की तुलाही असंच वाटत असावं,
तुझ्या मनाच्या कोपर्यात कुठेतरी, मी हळूच वावरावं,
तुझंही स्वप्न गोड असेल, स्वप्नात माझीच ओढ असेल,
आरशात पाहतांना देखील तुला, माझंच प्रतिबिंब दिसावं...

कुठेतरी वाचलंय मी की, काही नात्यांना नाव नसतं,
असुसलेल्या भावनांना, परतण्यासाठी गाव नसतं,
तरीही जपलंय मी आजवर, आपल्या मधलं हे अंतर,
तूच ठरवायचं आता हे, नातं निभवायचं कुठवर.....


- परशुराम महानोर


Tuesday, March 20, 2018

बीते पलोंकी यादें


दूर के फासलें, पास लगने लगे,
फिर नये अनकहें, ख़्वाब सजने लगे,

ख्वाईशें फिर नयी, ऐसी जगने लगी,
फुल चाहत के, चेहरेपे खिलने लगे,

हम न जाने कहा, ये रुका काफ़िला,
रास्ते मंजिलोंसे, अब जुड़ने लगे,

ना कहा ना सुना, फिर भी समझा दिया,
राज़ आँखोंसे दिलमें, अब उतरने लगे,

क्या पता अब हमें, हैं जाना कहा,
तेरे सायें के पीछे, सब चलने लगे,

हैं यकीन अब मुझे, तूम मिलोगे यही,
हर दुआमें तुझे ही, हम मांगने लगे,
-परशुराम महानोर

Saturday, March 10, 2018

स्वप्नातल्या परीची गोष्ट


तू स्वप्नात येतेस जेव्हा, रात्र लहान वाटू लागते...
तुझ्या नाजुक स्पर्शफुलांची, आठवण मनात दाटू लागते...

तू स्वप्नात येतेस जेव्हा, हळुवार वाहतो गार वारा....
तुझ्या सरकत्या पदराआडून, क्षितिजावरती तुटतो तारा...

तू स्वप्नात येतेस जेव्हा, उजळून जातो आसमंत असा....
तुझ्या रेशमी केसांवरती, जसा चमकतो चंद्र कवडसा...

तू स्वप्नात येतेस जेव्हा, स्वप्न न माझे स्वप्न राहते...
जागेपणीचे रुक्ष जगणे, क्षणात तुझ्यात विरून जाते...

तू स्वप्नात येतेस जेव्हा, शब्द चांदण्या बोलू लागती...
स्वप्नातल्या त्या परीची गोष्ट, पुन्हा एकदा सांगू लागती...
                     - परशुराम महानोर

Sunday, February 18, 2018

तुझ्या प्रेमात न्हाउदे, मला बेभान होऊनी...


दूर आभाळात चढे, जेव्हा शुक्राची चांदणी..
भासे मला तू ग उभी, जशी माझ्या या अंगणी...

तू हसता गालात, चंद्र मोहरला नभी...
बरसली चांदरात, तुझ्या रुपात भिजुनी...

तुला समोर पाहता, उरी धडधड वाढे...
माझं घायाळ काळीज, तुझ्या नयन बाणांनी.....

तू जवळ येताच, भरे श्वासात सुगंध...
जाई-जुई मोगर्याची, जणू शाल पांघरुनी...

तुझ्या मैफिलीत जेव्हा, मी गायलो एकटा...
थरारले तुझे ओठ, माझ्या डोळ्यात पाहुनी...

आता सोसायच्या किती, तुझ्या फुलांच्या जखमा...
तुझ्या प्रेमात न्हाउदे,  मला बेभान होऊनी...

-   परशुराम महानोर


Wednesday, January 31, 2018

उरलेल्या जगण्याला, श्वासांची साठवण...!

उघडी कवाडे, अन , तुटलेल्या भिंती,
आजवर जपलेली, अदृश्य नाती,

थोडंसंच स्वप्न, तुटण्याच्या भीतीनं,
पापण्यांत ठेवलं, कधीच नाही पाहिलं,

थोडीशी आपुलकी, थोडासा विश्वास,
थोडासा त्रास, थोडाच राहिला प्रवास,

थोडीशीच उरलेली, तुझ्यातली तू,
अन थोडासाच उरलेला माझ्यातला मी,

थोडंसंच प्रेम, अन, थोडीशी आठवण,

उरलेल्या जगण्याला, श्वासांची साठवण...!

-परशुराम महानोर

Thursday, December 21, 2017

ती आज गोठली आहे



कोमेजल्या फुलांनी, ही प्रीत माळली आहे,
माझी अनंत स्वप्ने, मी आज जाळली आहे,

नव्हतो कधीच येथे,  मी भाग शर्यतीचा,
समजावूनी मनाला, मी हार टाळली आहे

आता नसे कशाची, ओढ ही जीवाला,
सोडून पावलांना, ही वाट चालली आहे,

सरता सरता ही सरेना, हा काळोख दाटलेला
निजवून मज उशाशी, ही रात जागली आहे.

            भिजवून आसवांनी, मोहरून सर्व काया,
ओल्या मिठीत माझ्या, ती आज गोठली आहे...!

-परशुराम महानोर

नवीन वर्ष आणि व्यायामाचा संकल्प

लवकरच २०१९ संपून २०२० हे नवीन वर्ष सुरु होणार आहे.  प्रत्येक वर्षाच्या सुरवातीला अनेक संकल्प केले जातात. तया मधला सर्वात आवडीचा आणि दरवर्षी...